حاكورة سميح

اخبار سوريا والعالم/ worldnews-sy.net

كيلو بصل الأخضر ب ١٥ الف!!!!!

من زمان ما كنا نهكل هم الأكل حد البيت مشتلة فيا كل انواع الحشيش..

 بصل اخصر وفجل وسلق وسبانغ ورشات وحش حشيشة وهندبة وخس وبقدونس ..

وبلبستان في كل انواع الخضرة موجودة بندورة وخيار وباتنجان وفاصولياء وفليفلة ولوبي وبامة وملوخية  وعرانيس بلدية حلوة متل العسل..

بالضيعة ماكان في بياع خضرة ولا براد كنا ناكلا تازة..

والفواكه الطيبة..

التين والعنب والرمان والتفاح والدراق والاجاص والبرتقال والليمون..

بالبيت في مونة لسنة من زيت وبرغل وحنطا وحمص وفريكة وكشك وملبن ودبس عنب ودبس رمان وحامض حصرم وزبيب وعرق بلدي مثلث..

وجرار القريش وقطارميز اللبلور معباية سمنة وزبدة ولبنة وجبنة ومعقود التين..

والتمر كان يجي بالقشة ( القشة على شكل برميل مصنوعة من اوراق النخيل وزن التمر فيها تقريب ٥٠ كيلو..

وسليق البرية الطيبة ( اليوم محرومين منا)..

جدران المطبخ كانت مزينة بحبال الفاصولياء المقددة والبامة واليقطين والباتنجان والفليفلة

الضيوف كانو يجو عائلات ويضلو عنا كتير وما يهمنا لو إيجو فجأة كان الخير كتير…

اليوم الارض صارت مهجورة والحشيش اعلا من الشجر في ناس بتعمل اكتر من مية تنكة زيت  وبتلاقي ارضا كلا حشيش قشة كبريت بتشعل الاراضي كلا من كتر الاهمال..

 حد البيت مهجور مكب للزبالة.. علب سردين وعلب سمنة وقناني بلاستيك وكياس نايلو ونفايات من جميع اغراض البيت…!!

والكل بيسأل ليش صار فينا هيك…!

صار فينا هيك لأن نحنا بدنا هيك…!!

سميح عبود…