حيل ونصايح سريعة للمكياج….

حيل ونصايح سريعة للمكياج

1- اخفاء انتفاخ العين
لو عندك انتفاخات في منطقة تحت العين ادمجي كريم العين مع الهايلايتر مع الكونسيلر وحطي الخليط ده على منطقة تحت العين من بره لجوه, وعند منطقة عضمة الحاجب هتظهرها وتديها اضاءة.

2- اختاري لون الفونداشان يكون ماشي مع لون رقبتك
دايما قلقنا واحنا بنشتري الفونداشان أو الكونسيلر إن اللون يطلع غامق أو فاتح ومش لايق علي بشرتنا, بس لأنه رقبتك مش بتتعرض لأشعة الشمس زي وشك, هي بتبقي أفضل بكتير لمطابقة اللون الحقيقي من خدودك أو تحت عينك.

3- كريمك المرطب مع كونسيلر
اخلطي مع كريمك المرطب كونسيلر أو كريم أساس. واستعمليه ككريم مداري لعيوب الوش. وممكن تحطي الخليط ده في علبة ويبقي معاكي في شنطتك وإنتي بره البيت تستعمليه أي وقت للترطيب أو تظبيط مكياجك.

4- غمقي او فتحي كريم الاساس بطريقة سهلة
مشكلة بتقابل كتير من البنات لما بنشتري كريم الاساس ممكن تطلع درجته اغمق او افتح من درجة بشرتنا ومش بنعرف نتصرف ازاي, النهاردة هنقول لبنات حوا حل لمشكلة لون كريم الاساس.

لو جبتي كريم الاساس ولقيتي لونه غامق عن لون بشرتك هيبقى الحل انك لما تيجي تحطيه اخلطي معاه كمية من اي نوع كريم مرطب بتستخدميه هيفتحلك اللون.

لكن لو كريم الاساس طلع فاتح عن لون بشرتك وعايزة تغمقيه شوية في الحالة دي هيبقى حله انك لما تيجي تحطيه اخلطي معاه كمية بسيطة جدا من كركم البشرة هيغمق لونه وكمان هيديكي درجة اللون اللي على دهبي وهيدي لوك حلو جدا للبشرة.

5- استخدمي النشا بديل للوس بودر لتثبيت المكياج
كلنا عارفين ان اللوس بودر هي وظيفتها تثبيت المكياج لفترة اطول ، النهاردة هنقولك بديل طبيعي للوس بودر وهيديكي نفس الفاعلية وهو النشا.

بكل بساطة بعد ما تعملي خطوات مكياجك بالطريقة العادية وتحطي كريم الاساس ، هاتي النشا وحطيه على البشرة زي اللوس بودر بالفرشة او بالبيوتي بلندر وادمجيه كويس ، وركزي على المناطق اللي بتبقى دهنية اكتر زي منطقة التي زون ، هيثبتلك المكياج فترة اطول وكمان هيدي ملمس ناعم ومخملي جدا للبشرة.

والنشا مناسب لكل انواع البشرة وخصوصا البشرة الدهنية والمختلطة